Promover o uso do galego como lingua de socialización entre a comunidade universitaria é o obxectivo de Falamos, un programa impulsado pola Concellaría de Normalización Lingüística do Concello de Pontevedra e a Área de Normalización Lingüística da Universidade de Vigo, que propón ao alumnado novas actividades para os próximos meses, como un ciclo de conversas virtuais sobre diferentes temáticas e encontros na rede social Instagram. Estas dúas propostas súmanse, no programa articulado para o segundo cuadrimestre, ás novas edicións do voluntariado lingüístico, o club de lectura e o cinefórum. Por mor da situación sanitaria, todas as actividades levaranse a cabo de xeito virtual, coa excepción das novas proxeccións do cinefórum, previstas para o mes de maio.

A inscrición, tanto no programa, como nas súas diferentes actividades, que se realizará nos últimos días do mes previo ao seu desenvolvemento, pode realizarse en snl.pontevedra.gal

Conversas e encontros na rede

As conversas e os encontros no Instagram son as dúas novidades que o programa incorpora para estes meses. As primeiras preséntanse como “espazos para participar en grupo falando sobre temas de interese para a comunidade de Falamos”, que se desenvolverán unha vez ao mes, polo de agora de xeito virtual. A primeira cita terá lugar o 23 de febreiro, baixo o título de E ti como ves a cuestión da lingua en Galicia? e será moderada por Ramallo. O 17 de marzo, a axente musical Patricia Hermida conducirá un coloquio titulado Pódese vivir da creatividade? Imaxina a túa carreira profesional; mentres que o 15 de abril Alberto Oubiña, presentará Galiza 2050, cara onde imos?, e o 27 de abril a creadora de videoxogos Dháunae de Vir moderará unha conversa titulada Pódese traballar en Galicia? Traballar aquí ou saír fóra.

Por outra banda, os Encontros no Instagram estarán dirixidos a “incentivar que a mocidade use a lingua nas redes sociais”, destacan desde a organización. Estes encontros virtuais con “persoas de referencia para a mocidade universitaria” levaranse a cabo no mes de marzo e os inscritos e inscritas poden xa presentar as súas propostas para a esta actividade.

Voluntariado, lectura e cinefórum

Nestes meses poranse en marcha de novo tres actividades xa desenvolvidas na primeira etapa do programa, como o voluntariado lingüístico, unha iniciativa que “permite coñecer xente e mellorar os usos orais da lingua”, destaca a organización. Para iso, fórmanse parellas que reúnen a un inscrito ou inscrita que fala galego con fluidez cun “aprendente” que desexe mellorar o seu dominio do idioma. No primeiro caso, a actividade está aberta a alumnado, profesorado e persoal de administración e servizos do campus, mentres que o segundo pode resultar tamén de interese tanto a estudantes que poidan considerarse “neofalantes potenciais” como a alumnado chegado de fóra de Galicia, á vez que está aberto tamén a persoas alleas á comunidade universitaria. O prazo de inscrición nesta iniciativa permanecerá aberto ata o 22 de febreiro, cando terá lugar unha sesión de presentación en liña da actividade, na que se lles propón que se reúnan unha vez por semana para falar, en galego, das cuestións que lles interesen.

Tamén continuará desenvolvéndose, de xeito virtual, o club de lectura, “un espazo para comentar e debater en galego lecturas de textos literarios escritos ou traducidos ao galego”. Retomará a súa actividade o 8 de febreiro cunha presentación, na que os participantes escollerán os libros que centrarán as sesións de abril e maio, mentres que o coloquio programado para o 1 de marzo virará arredor da novela Senlleiras, de Antía Yañez.

A única actividade que non pode levarse a cabo de xeito virtual é o cinefórum, e por iso as súas tres novas sesión foron programadas para maio. Organizado coa colaboración do Cineclube Pontevedra, programáronse, para os días 13, 19 e 26 dese mes, as proxeccións dos filmes Dorothé na vila, de Olaia Tubío e Alejandro Gándea; As nosas derrotas, de Gabriel Périot; e Vikingland, de Xurxo Chirro.

PROGRAMA 2ª VOLTA 

FEBREIRO

Inscrición do 27/01 ao 31/01

• Luns 8 | Club de lectura

20:00 h. Presentación en liña

• Martes 9 | Encontros no Instagram

20:00 h. Presentación en liña

• Luns 22 | Voluntariado lingüístico

20:00 h. Presentación en liña

• Martes 23 | Conversas. E ti como ves a cuestión de lingua en Galicia

20:00 h. Debate en liña

MARZO

Inscrición do 26/02 ao 04/03

• Luns 1 | Club de lectura. Senlleiras

20:00 h. En liña

• Martes 2, 9. 16 e 23 | Encontros no Instagram

+info: falamos@-pontevedra

• Mércores 17 | Conversas. Pódese vivir da creatividade? Imaxina a túa carreira profesional

20:00 h. Debate en liña

• Luns 22 | Club de lectura

20:00 h. En liña

ABRIL

Inscrición do 26/03 ao 01/04

• Luns 12 | Club de lectura

20:00 h. En liña

• Xoves 15 | Conversas. Galicia 2050. cara a onde imos?

20:00 h. Debate en liña

• Martes 27 | Conversas. Pódese traballar en Galicia. Traballar aquí ou saír fóra

20:00 h. Debate en liña

• Luns 22 | Club de lectura

20:00 h. En liña

MAIO

Inscrición do 28/04 ao 02/05

• Xoves 13 | Cinefórum. Dorothé na vila

20:00 h. Teatro Principal

• Mércores 19 | Cineforum. As nosas derrotas

20:00 h. Teatro Principal

• Mércores 26 | Cineforum. Vikingland

20:00 h. Teatro Principal

CARTAZ PROGRAMA 2º CUADRIMESTRE

Os 3 espectáculos escollidos a través da Rede Galega de Teatro en colaboración coa AGADIC, terán lugar o 25 de febreiro, 11 de marzo e 20 de maio no Teatro Principal de Pontevedra ás 21:00 h. Os mesmos completarán a programación dos Domingos do Principal e Salón do Libro, así como a musical que se presentará máis adiante.

A nova edición do ciclo Ponteatro, normalmente celebrado durante o 2º semestre, comezará o 25 de febreiro cunha estrea, “Comando comadres” de Matrioshka Teatro, escrita pola polifacética e recentemente recoñecida co premio María Victoria Moreno, Lorena Conde. Unha peza en clave de humor que convida á reflexionar sobre o patriarcado.

Seguirá o 11 de marzo, con temática feminista tamén porque nunca é abondo nestes tempos pero resulta tamén acaído pola data con “Feminíssimas” de De Ste Xeito Producións, de Esther F. Carrodeguas. Unha comedia negra chea de risas pero tamén de reflexión”.

O terceiro, e último dos espectáculos terá lugar o 20 de maio con “O mozo da última fila” de Redrum Teatro e unha adaptación feita polo tamén director, Alex Sampayo, do texto de Juan Mayorga, representado en todo o mundo e sempre de xeito exitoso. Redrum é unha garantía do resultado e vai ser do agrado do público”.

As tres funcións levaranse a cabo segundo os aforos vixentes, de 98 persoas no Teatro Principal, para cumprir coas normas.

Entradas á venda en Ataquilla.com a un prezo único de 8,00 € (4,00 € para Carné Xove, desempregados/as e maiores de 65 anos) e de non esgotarse na billeteira física de 19:00 a 20:00 h. Por mor do protocolo COVID a billeteira ten que pechar unha ahora antes do inicio do espectáculo.

PROGRAMACIÓN PONTEATRO 2021

Xoves 25 de febreiro

“Comando comadres” de Matrioshka Teatro

Unha das primeiras representacións desta peza, representarase por primeira vez a semana anterior na Estrada, escrita pola polifacética Lorena Conde, que recentemente gañou o premio María Victoria Moreno e dirixida por Gena Baamonde conta no seu elenco con Chelo Rejo, Anabel Gago e a propia Lorena Conde.

Un espectáculo en clave de humor para público adolescente e adulto no que un grupo de artivistas organizadas en diferentes comandos poñen en evidencia as múltiples manifestacións da violencia patriarcal e cuestionan a persistencia dos seus valores no pensamento hexemónico actual e na xestión dexenerativa dos recursos naturais.

A peza está composta por cinco comandos de temáticas diferentes;

COMANDO MEIGAS céntrase na demonización das mulleres que non encaixamos no modelo patriarcal.

COMANDO SIÑAS fálanos da invisibilización das mulleres de certa idade que xa non cumprimos as expectativas reprodutivas do patriarcado.

COMANDO SACHO afiánzase na sabedoría e na fortaleza das mulleres lonxe dos estereotipos de seres débiles ou vítimas.

COMANDO RETRANCA expón con humor as falacias que durante séculos se teñen dito das mulleres.

COMANDO CATAPLASMA reivindica o saber ancestral das mulleres en conexión coa terra e os ecosistemas saudables, o coñecemento e uso das plantas e os procesos de acompañamento e coidados.

Xoves 11 de marzo

“Feminíssimas” de De Ste Xeito Producións

Esta peza de Esther F. Carrodeguas, dirixida por Xabier Castiñeira conta no seu elenco con Stephy Llaryora (Ruka), Esther F. Carrodeguas (Gabi) e Noelia Blanco (Bea).

Un Congreso Feminista na cidade de Vigo. Tres amigas da adolescencia que fai anos que non se ven. Tres amigas que teñen 3 maneiras ben distintas de entender o “feminismo”… Por exemplo: feminismo radical, feminismo liberal e teoría queer.

Esta é a base de Feminíssimas, unha peza con altas doses de humor, ironía e complicidade para poñer a amizade a proba mentres analizamos -dende a comedia- de que maneira as mulleres estamos a con-vivir neste novo mundo feminista no que nos atopamos mergulladas.

Unha maneira –tamén- de rirnos de nós mesmas, das nosas propias incongurencias e sobre todo do espazo que separa a teoría pura da práctica diaria.

Un espazo –ademáis- para reflexionar sobre a amizade e a súa complexa relación coa ideoloxía.

En resumo: unha comedia negra… moi violeta.

Xoves 20 de maio

“O mozo da última fila” de Redrum Teatro

Unha adaptación da obra de Juan Mayorga levada a cabo por Álex Sampayo, que tamén dirixe. Moi exitosa no seu percorrido pese á pandemia, conta no seu elenco co pontevedrés Guillermo Carbajo e Roberto Leal, Belén Constenla, Mónica García, Machi Salgado, Rúben Porto.

Claudio é un estudante de dezasete anos que senta na última fila. Non fala, non participa, non é problemático, non destaca, salvo en Matemáticas. Cada clase fáiselle máis insoportable ata que

Xermán, o profesor de Lingua e Literatura, manda escribir unha redacción sobre a fin de semana. A partir deste intre, Claudio empeza a transformarse en alguén que observa, imaxina e escribe a vida doutros nun relato por entregas para un só lector. Ese relato compartido polo discípulo e o mestre convértese nun xogo cada vez máis perigoso para eles e para quen os rodea. Un xogo que se disputa en dous taboleiros: o da vida e o da literatura.

Desde a súa estrea en 2006, “O mozo da última fila” leva 26 producións por todo o mundo e foi adaptada ao cinema por François Ozon, con guión do propio Mayorga e co título “Dans la maison”, Concha de Ouro no Festival de San Sebastián en 2012. A obra foi escollida en 2018 dentro do plan de fomento á lectura en varios institutos de secundaria.

O concelleiro de Xuventude, Alberto Oubiña, presentou esta mañá os seis primeiros obradoiros dunha nova edición do programa Pisando forte que, ao igual que o resto da programación desta área municipal, se reformula e estende a súa programación a longo de todo o ano.

Segundo explicou Alberto Oubiña, “neste ano tan estraño exploramos o autocoñecemento e a intelixencia emocional”, como ferramentas orientadas a mellorar a empregabilidade das persoas mozas. Neste contexto, o concelleiro asegurou que na escolla da temática dos obradoiros se tivo en conta que “estamos a programar para a xeración que maioritariamente, por debaixo dos 35 anos, vén de sufrir dúas crises mundiais en moi poucos anos e que se ve obrigada a traballar nunhas condicións totalmente precarizadas cando son persoas que están moi formadas.”

Todos os cursos que inicialmente se deseñaron como presenciais poderán ser reformulados para ser impartidos en liña, se as condicións sanitarias o requiren. Na preferencia de admisión terase en conta a idade, entre 16 e 35 anos, o lugar de empadroamento, e reservarase unha lista de agarda para persoas con diversidade funcional. O prazo de inscrición xa está aberto e pode realizarse a través de xuventude.pontevedra.gal ou apuntate.pontevedra.gal

Obradoiros ofertados:

• Intelixencia emocional para os novos tempos. Será presencial, ofértanse 15 prazas e comezará o 10 de marzo. Este obradoiro está orientado a manexar as emocións de xeito positivo, produndizando no mundo emocional en momentos de cambio e incertidume.
• Habilidades comunicativas. A túa marca persoal en redes sociais. Será en liña, ofértanse 20 prazas e comezará o 15 de marzo. Ten por obxectivo o correcto manexo das redes sociais e a identificación das máis rendibles no eido da empregabilidade.
• Seguridade informática e sinatura dixital. Será en liña, ofértanse 15 prazas e dará comezo o 22 de marzo. Inclúe módulos relacionadoos con certificados e sinaturas electrónica e dixital
• Educación ambiental e compostaxe. Será presencial, ofértanse 15 prazas e dará comezo o 15 abril. Está orientado á formación en experiencias de xestión de residuos a través do funcionamento de composteiros.
• Mindset para os novos tempos. Instalando o teu antivirus persoal. Tamén será presencial, con 15 prazas e comezará o 4 de maio. Está deseñado para coñecer o Mindset como filosofía de crecemento persoal e profesional, a través da incorporación de mentalidades abertas cara a contorna.
• Descobre o teu talento. Será presencial, ofértanse 15 prazas e dará comezo o 19 de maio. Estará centrado no desenvolvemento persoal e profesional que permita accións de emprendemento cara ao mundo laboral.

O programa ‘Noites Abertas’ xa está en fase “desconfinamento” e prevé realizar en formato presencial 24 das 29 actividades programadas ata finais do mes de maio.

A idea de sacar á rúa este programa segundo o fora permitindo a evolucuón da situación sanitaria xa estaba prevista desde o inicio, segundo anunciara no seu momento o concelleiro de Xuventude. Alberto Oubiña.

O propio Oubiña achegouse esta mañá ao inicio do reparto que os “astrounautas da noite” están realizando a pé de rúa por distintos puntos da cidade de cara a promover que a mocidade participe de xeito activo nas actividades de ocio que se ofertan a través deste programa.

“Desconfinar Noites Abertas en canto se puidera era un dos obxectivos que tiñamos, porque queremos que a mocidade pontevedresa volva gozar da rúa, que volva socializar no espazo público desta cidade, na que tanto presumimos de ter o privilexio de promover a pluralidade de usos e de poñelo a disposición da veciñanza” asegurou Alberto Oubiña na praza da Verdura, punto no que comezou o reparto informativo desta mañá.

Os ‘astronautas da noite’, que comezaron coa acción informativa de rúa o pasado martes, manterán a súa actividade ata comezos da vindeira semana.

Neste momento, a programación de Noites Abertas está xa totalmente actualizada na páxina web, indicando as actividades que se realizarán en liña e cales presenciais, cos puntos de encontro e horarios correspondentes.

Convén lembrar que tamén o código QR do cartaz desta edición de Noites Abertas enlaza directamente á páxina web.

A XXII edición do Salón Internacional do Libro Infantil e Xuvenil de Pontevedra, ‘Emerxencia Literaria: os libros salvan o planeta’ apostará polo espallamento de actividades presenciais, cun espazo fixo na Illa do Covo e unha furgoneta “Rodalibros” que levará actividades ás parroquias do 23 de abril ao 9 de maio.

Dadas as restricións de aforo e medidas sanitarias é preciso reservar no seu web www.salondolibro.gal entradas (de balde) para prácticamente todas as súas actividades.

Estas entradas gratuítas, estarán a disposición do público de mércores a mércores a partir o 21 de abril e a organización agradece que, no caso de non poder acudir, se notifique para poder liberalas.

Podes descargar o programa aquí.

PARA GOZAR DO SALÓN, TEDE EN CONTA QUE…

Todas as actividades son de balde pero, para controlarmos os aforos, cómpre INSCRICIÓN PREVIA para TODAS AS ACTIVIDADES. As fins de semana tamén tes que reservar para visitar o espazo ambientado no Pazo de Cultura.

Para inscribirvos, teredes que visitar o web: www.salondolibro.gal no apartado PROGRAMACIÓN 2021 e escoller, dentro do calendario, a actividade desexada. Unha vez dentro da actividade, preme no apartado RESERVAR ENTRADA, escolle o número de prazas que desexas e dálle ao botón de CONFIRMAR RESERVA. Ollo! Se non dás a CONFIRMAR, non se fai efectiva a reserva.

Logo recibirás un correo electrónico de confirmación, cun código de barras que debes levar no teu móbil (ou impreso, se non usas smartphone) á actividade.

OLLO! ATENCIÓN! MOI IMPORTANTE!

As actividades este ano teñen un aforo MOI REDUCIDO polas restricións COVID19. Isto permitirá, con certeza, unha atención personalizada e unha experiencia magnífica e única en cada actividade PERO se por algunha razón tedes entrada e NON podedes vir ESCRIBIDE O ANTES POSIBLE ao correo: reservasalondolibro@gmail.com indicando día, hora e actividade e nº de prazas que “liberades” para que poidamos poñelas de novo “á venda”.

ORGANIZACIÓN, SEGURIDADE, PACIENCIA E… A GOZAR!

A pandemia quitounos a posibilidade de improvisar, de chegar enriba da hora… pero non nos impedirá gozar, un ano máis, do noso querido Salón.

Tentade chegar só un chisco antes das actividades mpara evitar amoreamentos innecesarios e tede paciencia porque a loxística será máis complicada que os outros anos (como a vida, en xeral).

Tedes que traer máscara e aplicar xel hidroalcohólico para todas as actividades e, IMPORTANTE, NON SE PODERÁ COMER nos espazos pechados nin nos abertos se non gardamos a distancia de seguridade.

Entre todos e todas faremos un Salón seguro.

PRÉSTAMO DE LIBROS

Para compensar as restricións de aforo, este ano decidimos habilitar o préstamo de libros da biblioteca do Salón. A que mola? Podedes levar DOUS LIBROS por crianza por un máximo dunha semana. Temos unha chea de libros novos para compartirmos con vós! Máis de 2.000 libros ao voso dispor!

VISITAS AO SALÓN

De luns a xoves, para visitar o espazo ambientado do Pazo da Cultura podes achegarte sen reserva previa, mais debes deixar os teus datos na entrada.

Os venres pola tarde, sábados e domingos, para visitar o Salón, debedes “reservar entrada” en calquera das quendas de visita:

– De mañá na quenda de 11.00 a 12.15h

– De mañá na quenda de 12.45 a 14.00h

– De tarde na quenda de 17.00 a 18.15h

– De mañá na quenda de 18.45 a 20.00h

Para iso, dentro do calendario de actividades de cada día, podes escoller a opción que máis che preste. Tamén poderemos facilitarche entrada in situ, se aínda quedan prazas de visita dispoñibles.

Para garantir a túa praza, mellor reserva antes, axilizarás o proceso e axudarasnos moito ás que traballamos na organización!

ONDE

Para o máximo goce e a seguridade de todos e todas, o Salón ocupará distintos espazos da cidade e as parroquias. Teremos unha “sucursal” fixa na Illa do Covo, ao ar libre.

No caso de que a climatoloxía non o permita, reubicaremos as actividades no Pazo da Cultura, en espazos seguros e confortables.

APERTURA DE BILLETEIRAS VIRTUAIS

Cada mércores, desde o mércores 21 de abril, abriremos as billeteiras das actividades da semana, de mércores a mércores.

A pandemia volve a influir na celebración da Festa dos Maios de Pontevedra por segundo ano consecutivo. O ano pasado a celebración coincidiu co confinamento polo que a Concellaría de Festas, xestionada por Carme da Silva, optara por trasladar a celebración ao ámbito dixital. Neste ano, o maio sairá á rúa pero aínda non recuperará a celebración tradicional dado que a situación depandemia non permite aos escolares nin ás asociacións reunirse para poder elaborar os maios nin ensaiar as coplas.

Neste 2021 a Concellaría de Festas programa unha exposición en distintos escaparates de establecementos comerciais da cidade e tamén amosará ao público como se elabora un maio.

Ao respecto da exposición que xa se pode ver nalgún escaparate da cidade, estará instalada até o vindeiro 29 de maio. Son fotografías de diferentes colexios e asociacións do concello realizadas polo fotógrafo Xosé Carlos Morgade entre os anos 1991 e 2019.

Os propietarios dos baixos comerciais colaboran con esta iniciativa permitindo rotular os seus locais con 44 vinilos situados nas rúas: Michelena, Gutiérrez Mellado-Oliva, Sabela II, Palma, Peregrina, Travesía do Comercio – Manuel Quiroga, praza de Ourense, Don Gonzalo, Pasantería, Ferraría, Sarmiento, Ferreiros, rúa da Ponte e rúa Real.

Ao respecto do maio que se instalará na praza da Ferraría, trátase dun obradoiro que ofrecerá a Asociación Cultural e Deportiva Campañó que todos os anos participa no concurso de maios.

Dende mañá pola tarde, a partir das 19.00 horas, e até o venres pola tarde, os integrantes da asociación farán un maio e unha coroa na praza da Ferraría respectando todas as medidas de seguridade sanitaria e acotando en cuadrículas a praza da Ferraría.

O maio quedará exposto na praza o sábado e o domingo.

O Concello de Pontevedra abre o 1 de maio o prazo de recepción de orixinais para o IV Premio María Victoria Moreno de Literatura Xuvenil convocado un ano máis xunto á editorial Cuarto de Inverno.

Os orixinais deberán remitirse ás oficinas do Pazo da Cultura de Pontevedra, ata o 30 de xuño de 2021.

O autor/a gañadora/a recibirá unha dotación económica de 4.000 euros por parte do Concello e a publicación da obra da man da editorial. Antonio Manuel Fraga, Beatriz Maceda e Lorena Conde resultaron galardoados nas 3 edicións anteriores.

Avanzabao onte a concelleira de Cultura Carme Fouces, acompañada por Andrea Jamardo de Cuarto de Inverno e Luz Gallego “Nenuca” da Libraría Seijas que forma parte do xurado do certame, do que achegamos as bases.

Foces destacou a “calidade das obras que puxemos no mercado, contribuíndo a enriquecer a literatura xuvenil e que, doutro xeito, ao mellor non estarían nas librarías. O máis habitual é que os premios estean máis vinculados ao infantil, á ilustración de de aí a importancia deste certame, centrado na LIX.

A concelleira pechou a súa intervención agradecendo ao xurado o seu traballo de lectura das obras – o ano pasado chegaron ás 40 – e á editorial o cariño e coidado na edición destas.

Pola dúa banda, Andrea Jamardo en representación de Cuarto de Inverno, agradeceu ao Salón do Libro e ao Concello esta aposta e o “honro de ser a editoria do Premio María Victoria Moreno. Hai moitos premios de infantil pero menos de xuvenil en parte por iso ten tamén moi boa acollida. Cada ano recibimos máis orixinais, todos con moi boa calidade”.

Jamardo lembrou a Lorena Conde, gañadora da pasada edición, pontevedresa e alumna de María Victoria quen” coido, estaría contenta co premio pola homenaxe que supón pero tamén polo coidado do libro en si”

Luz Gallego, da libraría Seijas, en representación do xurado destacou a grata sorpresa ao formar parte do xurado o ano pasado por primeira vez – como exalumna, veciña e amiga de María Victorictoria – e descubrir a alta calidade das obras. “Pensei que leriamos moitos libros a algunhos poderiamos descartalos con facilidade pero descubrín obras con moita calidade, non sei se froito do confinamento”.

Fouces rematou a rolda convidando a “quen teña que dicir algo na literatura infantil e xuvenil a achegar aos seus orixinais. Agardamos non ter confinamento, pero que sexan froito da vida social e de poder alternar uns cos outros”.

Bases IV Premio de Literatura Xuvenil María Victoria Moreno

O concelleiro de Normalización Lingüística e Xuventude, Alberto Oubiña, acompañado polos comisarios Teresa Cuíñas e Pepe Cunha, presentou o luns 3 de maio a mostra ‘Cantámola en galego’ que definiu como “un paseo pola nosa música durante os últimos 20 anos e un achegamento ás bandas, ás solistas e a todas e todos aqueles que están facendo música en galego en diferentes estilos por todo o país”.

Trátase dunha exposición ‘transmedia’ na que se combinan 14 paneis con listaxes de reprodución en Spotify, listaxes de vídeos en YouTube e unha unidade didáctica, coa que, desde o Servizo de Normalización Lingüística, se oferta a posibilidade de coñecer oa ampla variedade de estilos e formatos do panorama musical actual en lingua galega.

A mostra permanecerá visitable na praza de Ourense durante todo o mes de maio e, a partires de setembro, será adaptada a formato itinerante por medio de roll upse estará dispoñible para centros de ensino, centros sociais e mesmo outros concellos que a soliciten.

Ademais, tamén se oferta unha unidade didáctica, tanto en formato impreso como descargable a través da web do Concello, para alumnado de secundaria realizada pola escritora e filóloga Rosalía Fernández Rial.

Alberto Oubiña explicou que esta mostra recolle toda unha eclosión musical nacida da revolución que no seu día supuxo o ‘bravú’ e asegurou que “esa revolución deixou semente, ampliouse, e cambiaron as maneiras de compoñer, cambiaron as letras, cambiaron os estilos musicais, e iso tamén favorece que, hoxe por hoxe, se escoite música en galego e ademais todas aquelas que o fan, o fan con orgullo na nosa lingua”.

Indicou ademais que “desta explosión musical vimos avisando no Concello de Pontevedra desde hai anos” e puxo como exemplo o festival Galegote Rock, que ten achegao á cidade a moitas das bandas e das solistas de todo o país que aparecen na mostra.

‘Como soa o século XXI en Pontevedra’

Precisamente dos paneis que ilustran as iniciativas ao redor da música popular contemporánea en Pontevedra falou a comisaria desta parte, Teresa Cuíñas que titulou a compilación baixo o epígrafe ‘Como soa o século XXI en Pontevedra’.

A xornalista pontevedresa asegurou que se trata dun “directorio de recursos da Administración local de formación e de práctica a disposición da cidadanía e tamén un sumario de eventos culturais de iniciativa pública e privada”, e sobre todo que “tivemos en conta aqueles que tivesen máis conexión co público mozo, que son os primeiros destinatarios desta mostra”.

Así, aparecen referenciados eventos como Cantos na Maré, o Culturgal ou o Salón do Libro dos que afirmou que “forman parte do ADN do país e son inseparables da mocidade e da creación musical en galego”. Tamén festivais como Surfing the Lérez, Cabos Soltos e o Galegote Rock. Salientou especialmente o progama municipal Xeración Sónica, xa pola terceira edición, e o que denominou “ese milagre chamado o Local de Música”, que cualificou como “un laboratorio de formación, ensaio, gravación, socialización e práctica e, ademais, eu teño para min que o local de música está chamado a escribir a historia da música nesta cidade e neste país”.

Por último, fixo fincapé en que a mostra “ademais do ánimo divulgativo tamén recoñece o enorme traballo profesional e artístico que implican estas accións” e insistiu en que “no global é un proxecto creado e pensado fundamentalmente para estimular na cidadanía, e nos adolescentes, a curiosidade e o interese pola música e sobre todo polas músicas en galego”.

Moito máis que música tradicional

Pola súa banda, o crítico musical Pepe Cunha situou o seu labor de comisariado como unha forma de “encauzar todo o que levo facendo durante 20 anos e tratar de compilalo por estilos, con respecto a como se expresan as artistas cun estilo e cunhas ferramentas musicais”.

Explicou que “máis aló do que se coñece como música combativa ou tradicional que sempre se asociou ao galego sen ningún problema, temos propostas de todo tipo” e centrou o período no que se centra a mostra “coindicinte coa chegada de internet, co feito de que gravar e compartir música pola rede sexa moito máis barato e iso tamén contribúe a que haxa moitísima oferta”.

Esta grande cantidade de oferta, esixiu no seu caso “unha peneira dos estilos” e, a este respecto, afirmou que “vai faltar xente pero penso que todas as propostas que están son imprescindibles”.

Asegurou que este proxecto “reafirma a miña ilusión por divulgar a música galega e divulgala dun xeito tan ‘oficial’ e con tanto coidado e tanto agarimo na presentación”, ao tempo que insistiu en que “hai un grandísimo descoñecemento de toda a variedade que temos, e hai toda unha fervenza de propostas que temos que poñer en valor e ensinarllas ao público”.

Paralelamente á programación infantil e xuvenil, familiar e escolar da XXII Edición do Salón Internacional do Libro Infantil e Xuvenil de Pontevedra, con máis de 300 actividades, esta edición inclúe, como novidade, un ciclo de faladoiros arredor da creación literaria e plástica, que comezou o pasado xoves cun diálogo interxeracional arredor da creación en banda deseñada, con Miguelanxo Prado e Pablo Prado.

Nesta semana, terán lugar as seguintes actividades:

Martes 4 de maio, 19.30 h.

Encontro lector con Kiko Dasilva sobre Os berros da motocicleta. Conduce: Montse Fajardo.

Salón de actos do Pazo da Cultura

Inscricións en www.salondolibro.gal

Mércores 5 de maio, 19.30 h

Encontro lector con Montse Pena Presas a partir da obra Intempestiva. Unha biografía (literaria) de Xela Arias. Conduce: Rosalía Fernández Rial

Libraría Paz

Inscricións en salondolibro@pontevedra.gal

Xoves 6 de maio, 19.30 h

Encontro lector con Editorial Catroventos: libros para salvar o planeta. Participa o editor: Isidro Dozo.

Libraría Paz

Inscricións en salondolibro@pontevedra.gal

Venres 7 de maio, 19.30 h

O oficio da escrita: Ledicia Costas e Mariña Maceiras

Salón de actos do Pazo da Cultura

Inscricións en www.salondolibro.gal

Sábado 8 de maio, 19.30 h

Meu dito, meu feito: unha achega á BD autoeditada

Actividade en colaboración con AGPI .Cristian Fojón, Inés Casajeros e Miguel Porto. Modera Óscar Iglesias

Salón de actos do Pazo da Cultura

Inscricións en www.salondolibro.gal

O Salón, ademais do lecer e a oferta do público escolar e familiar, busca ser un espazo de reflexión, de debate, de intercambio de ideas e iniciativas entre creadores e creadoras, tanto de textos como de ilustracións, arredor da vizosa Literatura Infantil e Xuvenil.

Dende a tarde do venres e ata o domingo 9 de maio, a carpa instalada na praza de España acollerá aos 26 expositores da I Feira de Alimentación de Produtos Naturais, Ecolóxicos e de Proximidade ‘O Mellor da Terra’, impulsada pola Concellería de Promoción Económica e Turismo de Pontevedra e organizada pola firma Embruxo en colaboración con Hoempo (Asociación de Hosteleiros de Pontevedra, Poio e Marín).

A inauguración deste evento gastronómico, que ten o obxectivo de lograr que alimentos e sabores díficiles ou imposibles de atopar en grandes superficies cheguen directamente do produtor ás nosas bocas, terá lugar o venres 7 de maio ás 17:00 horas, nun acto no que participará a concelleira de Promoción Económica, Yoya Blanco (os postos permanecerán abertos ata as 21:00 horas). Tanto na xornada do sábado como na do domingo haberá horario ininterrompido de mañá e de tarde, entre as 11:00 e as 21:00 horas.

Os que nestes días se acheguen ata a Praza de España atoparán produtos de primeira calidade como mel casera ‘made in Vilagarcía’, marmeladas sen colorantes nen conservantes cun formato espectacular e unha combinación de sabores brutal, as mellores cecinas de León e artigos gourmet de marcas como Pimentón de La Vera, Comesetas, La Curiosa, Pepa a Loba (co seu paté de centollo), Santiago Roma (cun viño elaborado en barrica de pedra e unha cervexa artesá confeccionada a partir dun zume de albariño), Iberbouquet (que achegará xamón ao corte), Croquetas D (que ofertará máis de 14 variedades de croquetas procedentes de Lugo) ou Galo Celta (ovos famosos ecolóxicos que namoraron a Martín Berasategui e Amancio Ortega e que se venden a un prezo de ata dous euros). Tamén haberá postres, con doces elaborados por firmas como Versos de A Ruda, da zona de Sanxenxo, e unha enorme variedade de queixos (desde Zamora ata Arzúa).

Asemade, Hoempo xa confeccionou un ‘mapa de tapeo’ no que algúns bares e restaurantes presentarán unha receita e farán unha maridaxe a partir de produtos dos provedores, aproveitando deste xeito as sinerxías cos hosteleiros, xerando un roteiro gastronómico e promovendo que os clientes vaian aos bares, proben a tapa e acudan aos postos da Praza de España a mercar eses produtos.

A triloxía «proletaria» ou «da clase traballadora», do director finlandés Aki Kaurismäki, composta polos seus filmes Sombras no paraíso, Ariel e A rapaza da fábrica de mistos, será a protagonista dos martes de cineclube durante o mes de maio.

Botan a andar tamén as sesións de filmoteca grazas ao convenio que veñen de asinar Cineclube Pontevedra e Agadic, o cal permitirá, un ano máis, achegar parte da programación do CGAI-Filmoteca de Galicia ao Teatro Principal de Pontevedra. Os dous luns previstos este mes dedicaránselle ao director chinés Wong Kar-wai, cuxa obra Desexando amar foi volveu ás salas este mesmo ano co gallo do 20 aniversario da súa estrea.

LUNS 10  | 20:30 | TEATRO PRINCIPAL DE PONTEVEDRA

CHUNGKING EXPRESS

Wong Kar-Wai, 1994, 103 min., VOSE

Dúas historias de amor independentes que se desenvolven no popular barrio turístico de Tsimhatsui, en Hong Kong. A primeira describe o fugaz encontro entre un mozo policía en plena crise amorosa e unha misteriosa muller fatal traficante de drogas. A segunda céntrase no singular romance entre un solitario e sinxelo axente de policía e a nova camareira do bar onde aquel adoita comer.

MARTES 11 | 20:30 | TEATRO PRINCIPAL DE PONTEVEDRA

SOMBRAS NO PARAÍSO

Aki Kaurismäki, 1986, 70 min., VOSE

Nikander conduce un camión do lixo en Helsinki. Ten un emprego do que se sente orgulloso e que lle asegura certa consideración. Durante toda a súa vida non leu máis ca tebeos e ninguén lle dixo que debería intentar prosperar. Con inocencia, atravesa este mundo hostil. Mais a súa situación muda cando coñece a Ilona, que traballa como caixeira nun supermercado.

MARTES 18 | 20:30 | TEATRO PRINCIPAL DE PONTEVEDRA

ARIEL

Aki Kaurismäki, 1988, 65 min., VOSE

Logo de perder o seu traballo nunha mina en Letonia, Taisto Kasurinen inicia nun vello Cabriolet branco a súa viaxe cara á gran cidade. O seu periplo estará cheo de infortunios e probas que superar, mais tamén atopará o amor, roubará un banco e fuxirá coa súa amada a México.

LUNS 24 | 20:30 | TEATRO PRINCIPAL DE PONTEVEDRA

DESEXANDO AMAR

Wong Kar-Wai, 2000, 95 min., VOSE

Hong Kong, 1962. Chow, redactor xefe dun xornal local, múdase coa súa muller a un edificio habitado principalmente por residentes de Shanghai. Alí coñece a Li-Zhen, unha moza que acaba de instalarse no mesmo edificio có seu home. Ela é secretaria dunha empresa de exportación e o seu home está continuamente de viaxe de negocios. Como a muller de Chow tamén está case sempre fóra da casa, Li-Zhen e Chow pasan cada vez máis tempo xuntos e fanse moi amigos. Un día, ambos descubrirán algo inesperado sobre as súas respectivas parellas.

MARTES 25 | 20:30 | TEATRO PRINCIPAL DE PONTEVEDRA

A RAPAZA DA FÁBRICA DE MISTOS

Aki Kaurismäki, 1990, 65 min., VOSE

A vida de Iris é gris e monótona: o seu traballo nunha fábrica de mistos é aburrido e cando chega á casa logo dun longo día tense que enfrontar ao seu padrastro, que a trata con crueldade. Polas noites sae bailar e intenta divertirse. Cando descobre que está embarazada decide que chegou o momento de mudar o rumbo da súa vida.

O Cineclube Pontevedra é unha asociación sen ánimo de lucro cuxo funcionamento e financiamento depende fundamentalmente das achegas económicas que realizan periodicamente as súas socias e socios, cara a quen están dirixidas as súas actividades. Asóciate!

O Cineclube Pontevedra, en colaboración co programa Falamos, planifica ao longo do mes de maio a proxección de tres filmes, cun faladoiro posterior, co obxecto de promover espazos de socialización en lingua galega relacionados especificamente co cinema.

Convén lembrar que o programa Falamos posto en marcha polo Concello de Pontevedra e a Universidade de Vigo, está concibido para incentivar o uso do galego entre a comunidade universitaria promovendo unha diversidade de espazos, contextos e actividades orientadas a acadar este obxectivo.

As sesións programadas polo Cineclube serán de balde e precisan inscrición previa, por cuestión de aforos e protocolos Covid, e están a abertas ao público xeral.

As inscricións poden facerse a través do enderezo de correo electrónico falamos@pontevedra.gal e, no caso de non obter resposta 24 horas antes, tamén se habilita o teléfono 646 908 177.

As tres sesións terán lugar no Teatro Principal ás 20:00 h.

Xoves 13 de maio

‘Dorothé na Vila’ (Alejandro Gándara e Olaia Tubío, 85′, 2020, Galiza, VO).

Sipnose: A musicóloga suíza Dorothé Schubarth chegou a Galiza a finais dos 70 na procura dos cantos antigos que desapareceran no centro de Europa. Desta busca saíron as 300 horas de gravacións que forman o Cancioneiro Popular Galego, a maior compilación de músicas tradicionais do país. Corenta anos despois, Alejandro Gándara e Olaia Tubío inician unha viaxe tras os pasos de Schubarth para atopar as voces que ela recolleu e descubrir as súas historias de vida. É un traxecto en que convive a alegría de volver cantar e a frustración de chegar tarde para coñecer un mundo que desaparece.

Prazo inscrición: antes do domingo 9 de maio.

Mércores 19 de maio

‘As nosas derrotas’ (Jean-Gabriel Périot, 2019, Francia, 96 min., VOSG. Lingua orixinal: francés).

Sipnose: As nosas derrotas ofrece un retrato da nosa vinculación coa política a través dun xogo de reinterpretación a cargo de estudantes de secundaria que reflexionan sobre conceptos coma os sindicatos, o capitalismo ou as revoltas sociais mentres interpretan e dirixen extractos de filmes do Maio do 68. Que valor teñen a revolución ou o compromiso no seu día a día? Como perciben o mundo no que medran? E, sobre todo, van querer mudalo, destruílo ou construír un novo?

Prazo inscrición: antes do xoves 13 de maio.

Mércores 26 de maio

‘Vikingland’ (Xurxo Chirro, 2011, Galiza, 99′, VO).

Sipnose: Mariñeiros galegos traballan nun transbordador entre a cidade danesa de Romo e a illa alemana de Sylt. Un deles merca unha videocámara e comeza a gravar a súa vida cotiá e a dos seus compañeiros en innumerables travesías en medio dunha invernía. Documento sobre a emigración galega no Norte de Europa. Transposición de Moby Dick, de Herman Melville. As imaxes orixinais posúen un alto potencial testemuñal, mais están altamente afectadas pola deriva tecnolóxica. Recuperáronse para volver vivir a experiencia esgotadora do traballo duns mariñeros que se atopan lonxe do seu fogar. Esta posta en valor de imaxes de VHS en tempo da HD pode considerarse como unha provocación. O filme é unha loita para evitar que o tempo siga minando a memoria milagrosamente insertada na fraxilidade dos soportes audiovisuais. Vikingland é unha nova oportunidade para dar conta de algo que todos daban por perdido.

Prazo inscrición: antes do xoves 20 de maio.

O ciclo Voices volve á programación cultural de Pontevedra e faino cun gran concerto de verán no que se darán cita a formación de Minessotta The Jayhawks e a de Ourense Os Amigos dos Músicos. A cita está programada para a tardiña do sábado 10 de xullo na explanada do Pazo da Cultura, recuperando o formato e o simbolismo do primeiro gran concerto a nivel galego despois do confinamento que tivera lugar o pasado ano da man de Guadi Galego e de Xabier Díaz.

Anunciárono esta mañá a concelleira de Cultura, Carme Fouces, e o productor musical, Carlos Montilla, que aproveitaron a presentación para lanzar unha mensaxe de “esperanza e valentía” de cara a de recuperar o pulso das programacións culturais que foron quedando adiadas no último ano. “Estamos comezando a a sentir a ledicia e a alegría de que, pouco a pouco, camiñamos cara a unha situación máis acaída como a que levabamos en Pontevedra ata antes do 2020 e imos desempolvando proxectos e poñendo a funcionar a maquinaria cultural, que nesta cidade é unha máquina bastante potente con maquinistas moi activos e moi activas” asegurou Carme Fouces. Pola súa banda, Carlos Montiña fixo fincapé en que se o gran concerto do ano pasado de Guadi Galego e Xabier Díaz “foi unha aposta valente e responsable, que foi como unha vitamina para o sector”, este ano “Pontevedra será pioneira na recuperación do panorama internacional na súa programación”.

Convén lembrar que o concerto de The Jayhawks xa fora programado para o ano pasado e quedara adiado por mor da pandemia, polo que a plataforma de venda de entradas Ataquilla.com remitirá un mail a todas as persoas que xa tiñan a entrada mercada informando das opcións para devolvela ou mantela. Para o concerto do ano pasado púxeránse á venda entradas a 24 euros e a 28 euros, pero o concerto deste ano terá unha única entrada a 24 euros polo que ás persoas que adquiriran entradas por 28 euros se lles devolverá a diferenza do importe.

En canto a aforo e protolocos sanitarios e de seguridade, a concelleira informou que de partida se traballará coas medidas vixentes, isto é, aforo limitado coas distancias esixidas para persoas sentadas individualmente (ao redor de 600 prazas) pero que estas medidas e aforos se irán revisando segundo evolucione a situación sanitaria e os protocolos pertinentes.

Sobre os grupos participantes, Carlos Montilla cualificou a The Jayhawks como “unha das bandas referenciais da música americana, con discos que xa son icónicos e parte da historia da música” ao tempo que explicou que o seu concerto de Pontevedra será unha ocasión privilexiada para escoitar en primicia o seu novo álbum ‘XOXO’ que saíu en plena pandemia, ao tempo que será a única data que teñen programada en todo o noroeste peninsular. Sobre Os Amigos dos Músicos salientou que emprega en todas as súas cancións a tradición oral e que “cantando en galego nos proxectan cara a fóra e a uns sons moi particulares e con moitas influencias de xéneros estadounidenses e trazas latinoamericanas”, polo que asegurou que a “combinación e a noite van ser perfectas”.